Ĕçре пысăк кăтартусем палăрччăр тесен, ĕçлемелли вырăн хăрушсăр та хăтлă пулмалла. Çавăншăн ытларах ертÿçĕсемпе яваплă специалистсем тăрăшаççĕ.

Çынсен ĕç условийĕсене тата вĕсен сывлăхне сыхлас енĕпе Октябрьски райповĕнче Т. Протянова специалист вăй хурать.

Вăл пĕлтернĕ тăрăх, райпо ĕçченĕсем тăтăшах районта, республикăра иртекен спорт мероприятийĕсене йышлăн хутшăнаççĕ, малти вырăнсене йышăнаççĕ. Унсăр пуçне кашни ĕçлекен хăйĕн сывлăхне Чăвашпотребкоопераци базинче вырнаçнă сиплев тата кану учрежденийĕнче çирĕплетме пултарать. Çавăн пекех организацире ĕçлекенсем кашниех ГТО спорт нормине çулсерен хатĕрленсе хÿтĕлеççĕ. Шывра ишесси, тĕрлĕ хусканусем тăвасси таранах кашни ĕçчен хăй нормине пурнăçлать.

Ĕç вырăнĕсем хăрушсăрлăх йĕркисене пăхăнса тăччăр тесе, организацире çутăпа тата ăшăпа тивĕçтересси çине тимлĕн пăхаççĕ. Çулсерен ăшă парас тапхăр çитнĕ вăхăта кирлĕ документацие хатĕрлессине çирĕп пăхса тăраççĕ яваплă специалистсем. Суту-илÿ учрежденийĕсенче те тавар туянакансене тивĕçлĕ условисенче кĕтсе илессишĕн тăрăшаççĕ кунта. Çавăнпа та ĕçсем аванах йĕркеленсе пыраççĕ. Çын инкек тÿснĕ е сусăрланнă тĕслĕхсем çук. Малашне те çапла пуласса шанатпăр.

С. КОКШЕВА.