Маттуррисем - малта
Хаçат редакцийĕ Чăваш чĕлхин кунĕ тĕлне икĕ конкурс йĕркеленĕччĕ: аслисем хушшинче викторина тата шкул ачисем хушшинче «Чăваш чĕлхин пуласлăхĕ» ятпа çыру ĕçĕсен конкурсĕ. Халĕ вĕсен пĕтĕмлетĕвĕсемпе паллаштаратпăр.
Викторина ыйтăвĕ-сен хуравĕсене чи малтан Сĕнтĕрпуç ялĕнче пурăнакан Римма Дмитриевна Степанова шăнкăравласа пĕлтерчĕ, çавăнпа та вăл редакци парнине – «Пирĕн сăмах» хаçата ку çулăн иккĕмĕш çурçуллăхĕшĕн илсе тăма тивĕçлĕ пулчĕ.
Чăваш чĕлхин пуласлăхĕ пирки пурĕ 13 вĕренекен хăйсен шухăш-кăмăлне пĕлтерчĕç. Чи хастаррисем вара Хуракассинчи тата Шуршăлти вăтам шкулсенче вĕренекенсем пулчĕç. Çак икĕ шкултан конкурса пилĕкшер ĕç тăратнă. Çавăн пекех Сĕнтĕрпуçĕнчи пĕтĕмĕшле пĕлÿ паракан шкултан 2 ача, Урхас Кушкăри вăтам шкултан 1 вĕренекен хутшăнчĕç.
3-мĕш вырăна Екатерина Петрова (9 кл., Шуршăл шкулĕ) тата Наталия Трофимова (9 кл., Хуракасси шкулĕ) тухрĕç. Сĕнтĕрпуç шкулĕнче вĕренекен Алина Колесникова 2-мĕш вырăн йышăнчĕ. Урхас Кушкă шкулĕнче вĕренекен Анна Терентьева çĕнтерÿçĕ (сăнÿкерчĕкре) пулса тăчĕ. Пултаруллă вĕренекенсен ĕçĕсене «Пирĕн сăмах» хаçатăн çитес кăларăмĕсенче пичетлĕпĕр.
Н. КОЛЕСНИКОВА.