Нумаях пулмасть Шĕнерпуç ял хутлăхне официаллă хыпар çитмен пулсан, Çичĕпÿртре çуралса ÿснĕ Михаил Александрович Шемарин Тăван çĕршывăн Аслă вăрçинче хыпарсăр çухалнисен шутĕнчех юлнă пулĕччĕ.

Халĕ ĕнтĕ апла мар. Тверь облаçĕнчи Ржев хулинчи патриотла воспитани Центрĕнчен çитнĕ информаци тăрăх, пирĕн ентеше ик çул каялла Ржев хулинче совет салтакĕсен мемориаллă масарĕнче çар йĕркипе чысласа пытарнă.